सुर्खेतबाट काठमाडौंका लागि छुटेको बस दुर्घटना, २२ जना घाइते
नवलपरासी
२३ पुस / पूर्व नवलपुरको मध्यविन्दु नगरपालिका ११ बाहुनेकुना सोमबार बिहान बस पल्टिदा २२ जना घाइते भएका छन् । सुर्खेतबाट काठमाडौंका लागि छुटेको ना ५ ख ४६९६ नम्बरको बस तीव्र गतिका कारण अनियन्त्रीत भई पल्टिदा दुर्घटना भएको जिल्ला प्रहरी कार्यालय नवलपरासी जनाएको छ ।
घाइते मध्ये एकजनाको अवस्था गम्भीर रहेको छ । कालिकोट मानमा खर्चना गाउपालिका–२ बस्ने ५० वर्षीय धर्मबहादुर शाही गम्भीर घाइते हुनुभएको हो । अन्य घाइतेको अवस्था सामान्य रहेको प्रहरीले जनाएको छ ।
दुर्घटनामा घाइते भएका सबै जनाको पुरानो मेडिकल कलेज भरतपुरमा उपचार भइरहेको छ । ३४ जना यात्रु सवार रहेको बसमा १२ जना भने सकुशल रहेको प्रहरीले बताएको छ ।
अनियन्त्रित भएर दुर्घटना भएको बस सडकबाट करिब १०० फिट तल पल्टिएको छ ।
प्रहरीले वीरेन्द्रनगर सुर्खेतका बस चालक २१ वर्षीय हरिबहादुर सुनारलाई नियन्त्रणमा लिएर अनुसन्धान भइरहेको जनाएको छ ।